青青饺子澄澄粥

◆ 沈一珠

黄梅季，日脚看似平平淡淡，但是因为落落停停个雨，生活勿知勿觉也有了勿少变化。

前天，讲好几个朋友一道来画室白相，提前一两个礼拜选个日脚；结果四天前个天气预报讲落雨概率增加了。本来以为一半晴一半雨，也是一种趣味，呒没想到临到眼门前变成了一场泼天大雨，聚会就此歇搁。

昨日，有朋友要出远门，临时约了中浪到徐汇滨江海燕个画室碰头，大家分头准备了简餐，吃饭勿重要，就是祝个好，约个下趟再碰头个辰光，兴致来了还可以拎仔话筒，各唱各调，陈奕迅、越剧沪剧、梨花又开放……心里向倒是少了离愁别绪搭仔黄梅天个乌苏感觉。到了10点多钟，又零零星星开始落雨；上海人碰着迭种雨势，侪熟悉个，几乎用勿着撑伞。啥人晓得下半天回去路浪，雨密密麻麻落大了，坐辣车子里，看挡风玻璃浪，雨刮器刮脱一层又立即披上一层……

迭能个落雨天，有种事体可以做，有种事体就勿能做了。

今朝夜饭是南瓜。生活辣高科技时代，还真真勿晓得迭份南瓜是勿是新鲜。查了查，有春末夏初种下去，秋天里熟个南瓜；也有秋天种下去冬天收个南瓜。另外，海南种个南瓜，初春里种下去，仲夏里就好收了。葛末就看淡点时令，只要买来个南瓜摸上去软熟有水分，切外皮辰光顺滑方便，应该就是新鲜个。

烧粥用长南瓜，一斤左右一段，去囊，去外皮，切成小块，半罐头粳米，电饭煲调成烧粥模式，两个钟头左右，开镬盖用饭勺少许淘一淘，黄澄澄个南瓜粥，香甜，米油铮亮，像是一幅画上了一层上光油，弹眼落睛。

烧粥辰光准备饺子，天闷热，吃点粥，开胃养气；不过还是需要点干货个。所以用半斤黑猪肉，去皮，用绞肉机绞碎，勿要太碎，留点颗粒感，用力拌出劲道来；跟肉配个是滴溜圆个嫩南瓜，绿油油水嫩嫩，半只切片绞碎；再泡发一把黑木耳，用高压锅烧半个钟头，也绞碎；两样物事跟肉一道拌匀，假使欢喜嫩滑点个，可以再加只蛋进去，最后加葱花、盐、生抽、糖，一道拌匀。下出来个饺子，青青个南瓜色泛出来，吊胃口。