油麦菜配豆豉酱

◆ 沈一珠

今年春天雨少，立夏后就补落仔几场大雨。想想，老天爷为阿拉准备了搿点风风雨雨，只要接得牢就要用心接；大自然里个阴晴圆缺，抗拒勿了，就顺一顺；顺当了，心情也就好了。

搿天大清早雨落得大，就孵辣床浪听雨：雨大个辰光，铺天盖地，大气勿敢出；雨小个辰光就淅淅沥沥，像煞天与地辣呼吸；屋檐下面勿规则个雨滴声，让人想到交响乐队里负责打击乐器个乐手，有辰光还要拎出一只三角铁，抽空敲一记……千万勿要觉着迭个一声“叮”可有可无，用心去体会，侪是作曲家个心思。

前头一日是画课，周老师带了华夫饼、潮汕豆豉酱，跟大家一道分分。周老师有一颗善良又愿意分享个心，只要碰着好吃物事，总归想着带一眼拨大家。潮汕豆豉酱不同于从前粗放型个一坨，而是配好各种味道，30克一份，密封辣一只小罐头里，打开即食，可以拌饭，也可以烧菜。迭种方便，从前是难以想象个。

前两日辣一家有机农场买个一小箱绿叶菜送到了，其中有一小捆油麦菜。客服小姑娘特为关照，阿拉农场里个小菜勿打农药个，用勿着反复浸泡，汏脱点泥沙灰土就可以了。勿管哪能，迭个菜看上去碧绿生青、掐得出水来个样子，蛮讨人欢喜，正好可以搭豆豉酱一道烧一只菜。

豆豉酱炒油麦菜：油麦菜汏清爽，切段，快速焯水捞出来，沥干；开油镬，姜末下去煸香，加一勺松茸酱提鲜，一勺豆豉酱提香，翻炒均匀；倒进油麦菜，快速翻炒几记，盛出来就好吃了，脆嫩鲜美又爽口。

巧个是前段辰光还辣一本书浪看到一只由上海中医医院一位教授推荐个烧汤个方子，主要材料就是油麦菜、枸杞子和红枣。

做法：油麦菜汏清爽切段，与枸杞子、红枣一道摆镬子里，加水烧滚后再小火炖10分钟左右就好了，每天吃一趟。

教授讲，此方中，油麦菜清热解毒，枸杞子滋补肝肾，红枣养血安神，三者结合，对缓解耳鸣症状有一定帮助。

看出来了口伐？迭只中医方子完全菜谱化了，有烧法、吃法，没有“药”材个精确数量。既如此，假使厨房间正好有迭个三样物事，勿妨各取适量煮一碗汤吃吃，调调胃口。