童年端午个豆瓣粽

微信扫码看视频听钱程沪语朗读

◆王 洪

小辰光一到端午，阿婆就会得细心裹一篮香喷喷个小脚豆瓣粽。迭种粽子口感老有嚼劲个，豆香搭糯米香混辣辣一道，搭传统个肉粽、赤豆粽完全两样，是我童年端午个专属美味。

当时，蝉鸣还呒没叫起来，阿婆坐辣辣竹椅浪，脚稳当当个踏辣辣小矮凳浪，两只手像蝴蝶一样上下翻动，裹粽子个手艺娴熟清爽。豆瓣粽个馅料也老有讲究个，阿婆会得提前到集市浪拣新鲜个本地蚕豆，买回来以后剥脱绿皮，挖出青豆，再剥外皮，只留里向嫩绿个豆瓣。接下来伊就拿豆瓣搭糯米拌匀，再撒一眼眼盐搭仔胡椒粉，做豆瓣粽个原料就准备好了。

裹粽子个辰光，阿婆勿慌勿忙拿起一片粽叶，轻轻一折，就折出一只小巧个三角形。然后伊舀一勺糯米搭豆瓣，用粽叶仔细裹起来，再用两张粽叶裹出“脚跟”，用筷子拿糯米戳得严严实实。迭能裹出来个粽子啊，饱满又结实，吃上去自然老有嚼劲个。最后阿婆拿棉线一圈一圈绕，呒没多少辰光啊，一只只精致个小脚豆瓣粽就包好了。每次看到迭眼精致小巧个豆瓣粽，我总归要为阿婆高超个手艺惊叹。

裹好个粽子放辣辣大铁锅里煠，要煠一夜天。炉膛里向柴火噼里啪啦响，粽叶清香搭米香混辣辣一道往外飘。大清老早，阿婆拿煠好个豆瓣粽捞出来，摆辣辣一只大木盆里。接下去再烧一锅大米粥，一家门端午个早饭就准备好了。每当迭个辰光，我总会急吼吼个拿起一只粽子，小心翼翼个剥开粽叶，一股清香扑鼻而来。咬一口，软糯当中带一眼嚼劲，豆瓣个清香搭糯米个软糯辣辣嘴巴里交织融合，迭个味道就是端午独有个感觉呀。

阿婆看阿拉吃得开心，面孔浪向个笑纹像盛开个花瓣。伊还欢喜拿自家裹个粽子分拨勒邻居，左邻右舍统统侪夸奖伊：“只有阿婆能裹出迭种粽子！”

五十多年过去了，阿婆裹个小脚豆瓣粽老早就勿再出现辣辣屋里向个饭桌浪了，但是每当端午，熟悉个香味道就会从记忆深处飘出来，伊让我想起当年阿婆捏粽叶个娴熟手势，想起一家门围坐辣一道吃粽子个温馨场景，想起充满阳光搭欢笑个童年辰光。阿婆裹个小脚豆瓣粽早就成为阿拉心里向永恒个宝贝，承载阿拉最珍贵个回忆。