“顶上功夫”上银幕

◆ 储有明

辛亥革命胜利以后，老百姓统统剪脱辫子，理发剃头成了人人离勿开个一门手艺，勿管是求职见客，还是走亲访友，总归先要请剃头师傅修饰一番。老底子住辣石库门里向个男小囡毕业寻工作，或者相亲、做毛脚女婿，临出门前勿但自家屋里个姆妈，连关系好个隔壁邻舍也会关照一声:“头势清爽口伐？”

有一句对联：“虽是毫末技艺，却是顶上功夫”，讲个就是理发行业。“豪末”指理发过程中产生个碎发，“顶上”指理发师个双手辣了顾客头顶操作。过去上海最闹猛南京路浪个商店招牌，除脱百货业、理发业称“公司”，譬如南洋衫袜公司、鹤鸣鞋帽公司、南京理发公司、华安理发公司等，其他饭店、照相馆、银楼、茶叶店、咖啡厅……侪勿挂公司招牌个。

老底子上海商店里个营业员，侪会得鉴貌辨色、看山势。顾客进店，一看头二看脚，所谓“风头出辣头浪，蹩脚蹩辣脚浪”。对头势清爽、皮鞋锃亮个顾客，服务殷勤周到。剃头师傅近水楼台，天天头势清爽，下班以后换上西装，逛逛南京路，走进商店，看起来西装笔挺，头势煞清，常常会得拨营业员误认为是老板或者小开，闹出勿少笑话。

留学英伦、向萧伯纳学习喜剧艺术个名导演黄佐临，回国后于1947年第一次执导电影，就拍了一部喜剧片《假凤虚凰》。电影里石挥扮演理发师小毛，化名张一卿，在公众场合西装革履，风度翩翩，被李丽华饰演个寡妇范如华误认为是“金主”，由此展开一连串个喜剧情节。影片杀青以后，本来打算辣了大光明电影院办首映式，准备工作侪做好了，呒没想到走漏风声，闹出一场风波。原来大光明电影院隔壁有一家大光明理发公司，公司小开张慕儒打听到迭部电影个故事情节，连夜联络上海理发业同业公会。第二天一早首映式开幕前，影院门口就来了几百个身穿白大衣、头势煞辣势清个理发师。伊拉举标语，喊口号，抗议影片职业歧视。一歇歇又来了勿少记者，又是采访，又是拍照。

黄佐临看到事体越闹越大，只好紧急撤销首映式。最后由编剧桑弧操刀，剪脱勿少镜头，影片才得以低调公映。

据说当时桑弧正辣了追求张爱玲。张爱玲通过搿桩事体，看到了电影个影响力，也跃跃欲试，预备“触电”。呒没过多少辰光，伊就写出一部喜剧片《太太万岁》，交拨桑弧执导，由石挥搭仔张伐联合主演。到了2005年，上海滑稽剧团又拿电影《太太万岁》改编成滑稽戏，由老戏骨严顺开导演，盛况空前，十分叫座。