喜闻乐见“乒乓春晚”

文 /程志忠

每年春节前，总有一场让乒乓爱好者非常牵记个比赛，伊就是“新民晚报红双喜杯乒乓球公开赛”，也是阿拉搿点上海球迷心里个“乒乓春晚”。作为乒乓球爱好者，我当然要赶到现场观看比赛。今年个比赛放勒虹口体育馆举行。混合团体项目意外有了刘诗雯、周雨、闫安等国手加盟，让现场气氛更加爆棚。场内十几只乒乓台子浪，高潮迭起，精彩纷呈。最终刘诗雯、周雨领衔个沿浦一队强势夺冠，选手们个高超球技频频吸引眼球，让看台浪个球迷侪大呼过瘾。

讲到看“乒乓春晚”个爱好，离不开从小勒弄堂里打乒乓白相个经历。当时弄堂里个汏衣裳搓板是我爱好个摇篮，容国团、庄则栋、江嘉良等乒乓名将是我练球个动力搭仔偶像。除脱当中有段辰光，我去农场务农，呒没条件打球，后来回到上海，顶替到学堂工作，学堂里个乒乓房就成了我工作之余常来常往个地方。退休以后，又有社区乒乓房可以接轨。隔三岔五搭仔球友打得热火朝天，汗衫湿透。勿过么，虽然欢喜打乒乓，但是自家有几斤几两还是拎得清嗰，打乒乓个技术实在一般，所以特别欢喜看高手打球。

记得第一次看“乒乓春晚”，是勒王家宅路浪个“红厦”体育馆。几十张“红双喜”乒乓台同时开战，男女老幼各种年龄组个乒乓好手依次上阵，各展绝技，场面特别壮观，一下子就拿我吸引过去了。后来几届赛事转移到大一点个东华大学体育馆。我勿但自家按时去“轧闹猛”，还带儿子去接受乒乓熏陶。记得当年有勿少高手参赛。有“上海一怪”发球很妖，直横拍、左右角打法变化莫测个吴明飞；有弧圈高手屡演逆转好戏，两届男子单打冠军倪水雄；有沉着稳健防中有攻个女子王牌徐梅君；有球风凶悍，善于正反两面对拉弧圈个李灵波；还有技术全面敢于搏杀个新星朱毅……

2011年开始“乒乓春晚”转移到闵行体育馆，地方虽然偏了一点，但场馆更大，参赛球员搭仔观赛人数屡创新高。馆外天寒地冻，馆内热火朝天，我一次次迎着寒风，带仔干粮，从长宁区天山新村赶过去看比赛。记得2016年“乒乓春晚”最后一天决赛，风特别大，我搭仔儿子乘地铁1号线到莘庄出站，一阵狂风迎面刮过来，拿我眼镜刮落在地，右面一块镜片碎脱了。我迭个高度近视只好戴仔只有一块镜片个眼镜走进场馆。虽然“独眼龙看比赛，越看越吃力”，但是看到了左华荣、周敏、叶旻初、朱毅、李灵波等高手个巅峰对决，还是斜气捂心嗰。

再后来，“乒乓春晚”花色品种越翻越多，除脱原来男女各级别、组别外，又增加光板单打、孪生和家庭双打等项目。花样经一多，比赛场地又勿够了。主办方只好拿羽毛球馆临时改成乒乓球赛副馆，主副馆38只乒乓球台，场面超大。我就像脚踏风火轮，勒观众群里轧来轧去，啥地方精彩就去啥地方，忙得勿得了。

每趟比赛结束，手机里总会存满精彩镜头。乘车回去辰光，天已经墨墨黑，肚皮咕咕叫，心里特别开心。迭个大概就是一个乒乓爱好者独有个乐趣，也是对“乒乓春晚”最长情个告白！