过年之前 先掸檐尘

文 /杨保飞

老早过年之前，每家人家侪忙得勿得了，我记忆里印象最深嗰，除脱烧年夜饭，就是掸檐尘。记得一般是春节之前一个星期天，阿拉一家门侪要老清老早从床浪爬起来，简单吃过早饭，姆妈就拿阿拉兄弟两家头从房间里赶出去，用准备好个旧报纸，拿屋里个床、柜、桌、椅全部遮起来。然后轮到阿爸登场，伊头浪戴一顶用报纸折出来个三角帽，面孔浪戴一只口罩，手里一根绑仔一把扫帚个竹竿，用扫帚清扫天花板，先从房间四只角开始，再是四条边，一圈圈扫过去，拿几只房间个天花板全部扫一边。看看地面搭仔铺勒家具浪个旧报纸，上面落灰真勿少，侪是过去一年当中积累起来嗰。

阿爸拿天花板全部扫清爽以后，姆妈再进房间，轻手轻脚拿遮勒床、柜、桌、椅浪个报纸一张张卷起来，拿到房子外面抖干净，再仔仔细细叠起来，打包好，可以拿到废品回收站卖钞票。

接下来、就是揩玻璃窗。搿个由阿拉两兄弟包干。先用湿布拿窗玻璃两面侪揩清爽，等脱一息，让玻璃干一干，再拿报纸捏成团，用力揩窗玻璃个两面，直到窗玻璃全部光洁透亮，苍蝇钉上去也肯定要滑下来。

迭个传统一直保留到阿拉兄弟俩先后成家，另立门户为止。现在住房条件好了，客厅、卧室、厨房、卫生间，宽敞明亮，屋里还有吸尘器，好像呒没听到有啥人家过年之前掸檐尘了。