价廉物美是“大条”

文 /金洪远

我个老宅瑞康里被列为上海首批城市更新试点项目，近日以95.12%个签约比例生效。那天签好约，我到附近走走看看。

忽然发现有勿少人辣一家小店门口排队，除脱搭我一样个白发老人，还有勿少年轻人。买啥东西介闹猛？走过去一看，是益民厂生产个小点心，侪是小辰光吃过嗰。一个搭我差勿多年纪个顾客，讲闲话喉咙乓乓响：益民食品厂个“大条”，的的刮刮是老底子个味道！真是价廉物美。旁边一个中年顾客向伊讨教“大条”哪能吃。伊头一扬，讲：大条是百搭，冲牛奶、咖啡甚至豆浆，味道嗲得勿得了。

我读小学个辰光，姆妈辣益民食品厂工作，每个周末回到屋里，就会从手提包里拿出一包“大条”。所谓大条，实际浪是生产华夫饼干个边角料，厂里便宜卖拨职工，算是一种福利，后来也有少量送到厂里个门市部出售，因为价钿便宜味道赞，一放辣柜台浪，就拨抢购一空。为啥叫伊大条呢？姆妈告诉我，厂里老师傅侪是搿能叫，阿拉也跟着叫。

记得当年表弟经常辣礼拜天到阿拉屋里来，姆妈就会拿出一点大条，放辣小碗里，用滚烫个豆浆一冲，一股巧克力个香味搭仔华夫饼个麦香就辣房间里飘散开来。表弟连连惊呼：姑姑，迭个豆浆哪能介香介好吃？姆妈就坐辣旁边，一面笑嘻嘻看阿拉四个小朋友吃得香甜，一面自家吃淡馒头。当时隔壁邻居赵超构先生搭仔陈家伯伯是牛奶订户，用牛奶泡大条，奶香味道更浓更好吃。

大条是百搭。每逢有人来弄堂里爆米花，阿拉就拿大条、大米、珍珠米混辣一道，倒进爆米花个炉子里，一声轰响，就有一股巧克力个浓香辣弄堂里散发开来，原本不起眼个爆米花，因为有了巧克力个“搭配”，变得弹眼落睛。抓一把送进嘴巴，真是“味道好极了”！经常有人来打探大条个来路，我会自豪地告诉伊拉，侪是从益民厂买嗰。

我辣搿爿小店买了两包大条，虽然呒没花哨个包装、但工人师傅坚守几十年，一心一意做美食，让伊充满爱个味道，就像排辣我前面个老顾客讲个：价钿便宜虽然好，味道灵才是硬道理。我打算回到屋里，也用滚烫个豆浆冲一碗大条，勿晓得孙女个嘴巴里会勿会发出让我期待个惊呼：爷爷，大条真香真好吃！