太湖里向有船菜

文 /周允中

无锡个船菜，又叫太湖船菜，交关有名。供应菜肴个小船，过去侪叫画舫，里向布置邪气漂亮，雕梁画栋，好像富贵人家招待客人个厅堂。

船菜先上冷盘，再上热炒，冷盘主要是当地特产，像茨菰、水芹、茭白、嫩菱、鸡豆米、雁来菌、酱黄雀之类。咪一口黄酒，吃一口冷菜，邪气开胃。

至于热炒，其中主菜以太湖三白招揽顾客，但是勿同季节做法搭仔配菜勿一样。春天，原盅甲鱼、银鱼炒蛋、清蒸刀鱼。夏天，酒戧白虾、糖醋鳜鱼、葱焅鲫鱼。秋天、梁溪脆膳、蛋炒蟹粉、田螺塞肉。冬天，糟油白鱼、三丝银鱼羹。主菜后，还有几道精致个时鲜素菜，邪气爽口。

记得我小辰光辣无锡住过几年，当时经常跟仔大人去吃船菜，我最欢喜三只菜：红烧划水搭仔乌青秃肺，还有一道胖头鱼炖老豆腐汤，鲜美无比。每趟饭局结束之前，店家还会端上来一两道甜点，有桂花糖芋艿、酒酿小圆子、豆沙糯米羹等等。

我个老家是宜兴，搿搭也有做船菜嗰，但规模比无锡小，大多数船家是辣滆湖里做生意，也有挑靠近城镇个河道做生意嗰。菜肴呒没太湖船菜精致，一般是用船家自家捕捞个鱼、虾、螃蟹等水产品现做现买，自产自销，价钿便宜，经济实惠。

当时宜兴城乡有铜钿个人家，逢年过节，或者屋里有红白喜事，侪会叫一桌或者几桌船菜送到屋里，招待亲朋好友。有辰光，干脆喊几个做船菜个厨师到屋里来做菜，宜兴人个讲法就是：请大菜师傅掌勺……

时光匆匆，几十年过去了，想起当时辣无锡、宜兴吃船菜个事体仍旧相当清晰，可惜再去无锡、宜兴品尝船菜，却已经吃勿出当初个味道了。