思念洋葱个美好

文并图 /沈一珠

“洋葱那么美好，值得为它流下眼泪”，迭句是从焦桐《蔬果岁时记》里一篇叫《洋葱》个文章里抄来嗰，搿篇文章拿人与食物个关系，写得暖心暖肺。

之所以搿歇辰光写洋葱，因为又到了冬天。搿歇辰光，辛辣里带一点点甜味道个洋葱，对人体个安抚也暖心暖肺：“其鳞茎和叶子所含辛辣味油脂性挥发物，能抗寒、抵御流感病毒。美国南北战争时，联邦军队非常依赖它，以避免部队流传痢疾。”迭段闲话也摘自焦桐个《洋葱》。

焦桐是一个有趣个作家，除脱写文章出书，伊还做过出版、美食、文化推广等交关事体，伊写各种菜式，写哪能烧小菜，欢喜拿人世间个脉脉温情当作文字个调料，假使汏清爽迭层料粉与滋味，书里个内容很可能就会变得稀松平常。所以，写吃食，假使离开了人文情绪个包裹，再好吃个物事也会味同嚼蜡。

事实浪，洋葱个好处，东西方侪早有记载。古罗马人相信洋葱能治疗失眠、咳嗽、喉咙痛。中医讲，洋葱可清热化痰、理气和胃、健脾消食、发散风寒、温中通阳、散瘀解毒、提神健体。

烧饭烧菜个人侪晓得，切洋葱辰光，会眼泪水溚溚渧。关于迭个原因，焦桐勒文章里科普：洋葱含有氨基酸亚砜一类个有机分子，切开后会释放“蒜氨酸酶”，分解氨基酸亚砜，转换出一种硫化物次磺酸，次磺酸再重组成挥发性硫化物，刺激人个眼睛，常常会让人泪如泉涌。勿过，也因为迭个原因，就有人悟出一个人生道理：生活就像剥洋葱，一层一层剥下去，虽然有辰光会泪流满面，但值得坚持下去。

生活值得，洋葱也值得。

最后还是烧一只小菜，又香又暖个孜然洋葱炒牛肉。

红洋葱香、黄洋葱甜，随侬自家欢喜；汏清爽，剥皮，取半只，切丝备用；半斤牛肉，切薄片，加生抽、生粉、蚝油、糖和油拌匀，腌20分钟左右；油镬烧到五六成热，牛肉摆下去划散，到牛肉片变颜色了就盛出来；镬子里留点油，再烧到五六成热，拿洋葱丝摆进去翻炒，洋葱丝变软以后，再摆进牛肉片搭仔孜然，翻炒一歇，合好味道就可以盛出来吃了。