东亚杯现场球迷不多

娄一晨

昨天下午，老娄约了一个朋友谈事情。结果，正事儿还没说起，朋友就先扯起了有关足球的闲篇儿……

友人：娄啊，礼拜一夜里中国队踢韩国队个比赛我看到侬直播了呀，咪咕视频……

我：侬，又要骂两句国家队？

友人：有空哦，国家队有啥骂头？总归要输，输一只交输三只有啥区别？我只是想问侬，迭个东亚杯比赛，韩国队是东道主，现场观众呢？国家队比赛呀，韩国人民哪能一点面子也勿拨伊拉国家队呃啦？

我大笑：哈哈哈，阿哥啊，侬居然还要帮韩国队来操心？我看侬是真个蛮有空呃……

友人也笑：哎哎哎，侬笑啥啦？我只是有点奇怪呀……国家队比赛观众连阿拉苏超联赛只零头也呒没到，有点坍台了。

我：我只好讲侬老兄看韩国人比赛太少来……韩国国内联赛平常也观众勿多呃……我记得前两年看到过伊拉额数据，全北和首尔算是现场上座率最高额两支球队，平均每场大概也就是20000人勿到一点……亚冠主场比赛更加差……阿拉之前转播亚冠联赛额辰光，经常看到伊拉额球场看台廊厢空空荡荡，反而是阿拉额球迷，像申花啦山东啦，人数蛮多呃……

友人：呒人看个么去办伊做啥？韩国人脑子坏脱啦？

我：唉，侬老兄勿晓得，韩国日本勿重视东亚杯已经交关年数来！我印象当中从2007年就开始来……所以搿趟东亚杯，伊拉征召额球员侪是蹲了自家国内联赛踢球额人员，要么是年轻新秀，要么是30岁以上难般有机会进国家队额朋友，蹲了欧洲踢球额大牌一个也呒没。说明啥啦？

友人愤愤地接过话头：说明人家根本勿需要大牌球星照样可以捺阿拉揿了棚里摩擦！

我赶紧劝：哎，阿哥啊，侬勿是讲阿拉国家队有啥骂头？哪能侬又屏勿牢开骂了啦？

友人诧异：侬勿是问我说明啥啦？个么侬老娄想说明啥啦？

我：我是想讲搿趟东亚杯韩国日本根本就呒没大牌球星来参赛，所以对韩国观众完全呒没吸引力。所以，侬看到礼拜一夜里现场只有小猫两三只……我查过呃，中国VS韩国，现场观众4426个人……蛮好来，侬晓得礼拜二夜里日本VS中国香港只有几个观众？687个！

友人：啊？好来，覅烦来，我准备去现场看苏超来……虽然水平差一眼，但是现场多少闹猛？多少开心？侬讲阿是？