足协杯？“保安杯”？

娄一晨

本周二，老娄约了两位好友一起喝下午茶。天气凉爽，大家有说有笑。只是，A一边还在看手机直播……

B忍不住问他：哎，朋友，看啥么事啦？看了介起劲？

A：我勒嗨看足协杯抽签呀……哦哟，孙继海肇俊哲两只霉手哦……又捺申花海港抽了一道了喏……

B：啊？真呃？啥辰光啥辰光？老娄侬又要到现场去了咯？

我：我记得足协杯下头一轮应该就是6月20日左右……有眼记勿牢了……假使咪咕安排我去现场么总归要去呃呀……

A继续直播：老山东跟成都也抽了一道来……侪蹲了上半区啊？申花上港山东成都侪蹲了上半区？迭额算啥路子啦？足协存心搞事体咯？

我：哎，老兄啊，啥地方有介许多阴谋论啦？抽签迭额生活有偶然性呃……疫情之前有一年抽签，我还是现场主持人侬晓得吗？当时辰光两个嘉宾，一个是颜骏凌，一个是蒋圣龙。所以，侬勿好一枪头侪掿责任推到足协头廊厢去呃……

B：个么北京国安抽到啥地方去啦？也是上半区？

A：北京国安客场对大连，下半区。搿记搨着便宜来……喏，佴两家头一道看看喏，下半区一共五支中超球队，北京天津云南大连青岛西海岸。剩下来三支侪是低级别球队。阿是呒没其他强队了啦？

B：北京国安搿只便宜搨了结棍来……

我只好叹气：唉，两位阿哥啊，抽签当中有勿有做手脚？老早国际廊厢就有过风言风语传出来呃……比如讲老早欧冠抽签，嘉宾摸出来额乒乓球有冷有热。佴应该也听说过呃，对吗？但是，拨我讲起来，就阿拉国内迭只足协杯，介小额规模，共总就迭能几个强队，勿是搿一轮就是下一轮，早晚侪要碰了一道。有必要五斤吼六斤去做手脚吗？值得吗？

A：道理是对呃。但是现在出来额结果让大家勿得勿觉着里厢一定有阴谋呀……哦，介巧啊，申花上港山东成都侪混到上半区去啦？我是肯定勿相信呃！难道勿是要保送北京国安进决赛？

B：讲了好！搞啥么事，就是像保送！索性掿足协杯名字改脱，直接叫“保安杯”么算来……

我：哈哈哈，兄弟啊，凶是侬凶哦！ 2025 Chinese Football Association Security Cup……

大家都笑……